Werner Sebastian - die rechte Hand von Hans-Günter Schwarz

Werner Sebastian - die rechte Hand von Hans-Günter Schwarz



Werner Sebastian,
die rechte Hand von Hans-Günter Schwarz,
gratuliert seinem Chef zum 60. Geburtstag


Die Oiladung war fer uns Mitarbeiter vum Woigut „MC" Olass,
uns ä paar Gedanke zu mache:

Mer hänn uns g'froocht, was ich dann eigendlich an dem Phänomän
Hans-Günter Schwarz droo?
Do sinn mer uff die Idee kumme: Mer stellen 'nen äfach mol zu de Qualidätswoiprüfung o!

In de Farb un Klarheit gibt's nix auszusetze,
er sieht gut aus, also kinn mer ruhich ins Käschdel ä Kreitzel oisetze.

Jetzt sin mer beim Geruch:

Do henn mer gsaat, des ich net schwer,
do missen 5 Punkte her.
Denn rieche kann er besonders gut,
ob Appel, Melone, Zitrone, Vanille, Exotik odder Nuss,
alles, was im Woi sou riecht, ich fer ihn än besondere Genuss.

Jetzt kumme mer zum G'schmack:

Dodrinn ich er unschlagbar
Fer unsern Woi ich er net ersetzbar.
Egal, ob Riesling, Rieslaner, Weissburgunder, Scheu oder Muschkateller,
All sinn durch soi Händ worre zum Beschdseller!
Ob soi QbA, Kabinett, Spätles, Aus- Beere- Trockenbeereausles bis hi zum Eiswoi - S’ich wie an Drang,
sie bleiben gschmacklich in Erinnerung ä Lewe lang!
Also in dem Punkt ich die Bewertung äfach:
5 Punkte - des ich doch ä klari Sach!

Zum letschde Punkt — Der Harmonie:

Ä paar vun uns kennen en schun einiche Johr.
Un die kinn saache: Er ich än harmoniebedürftige Mensch mit Haut un Hoor
Viel, wu bei em waren in de Lehr
hänn hinnenoch g'sacht: „Wonn norre sou moin Vadder wär!"
Mer konn mit em schaffe, diskutiere oder zammesitze
Die Harmonie dut immer bei em blitze.
Kä Frooch, ach in dem Punkt fallt uns die Wahl net schwer:
Ach do missen 5 Punkte her!

Jetzt zum G’samtergebnis:

Drei mal 5 Punkte gibt 15 Punkte — geteilt durch drei = 5 Punkte
Des beschde was en Woi erreiche konn.
Des gilt ach fer Sie - Herr Schwarz - denn fer de Pälzer Woi sinn Sie de beschde Monn!


Neustadt-Haardt, den 23. Juni 2001                                                           Werner Sebastian


Werner Sebastian 1


Noch keine Kommentare vorhanden.

Was denkst du?